L'Asamblea d'Estudiantes contra l'EEES d'Asturies, énte los fechos socedíos demientres el día d'ayeri en Barcelona, col desagospiu de manera violenta de les/os estudiantes trancaes/os nel rectoráu de la Universitat de Barcelona y la represión postrera de les protestes por mor del desagospiu, manifestamos lo que sigui darréu:
Condenamos la represión brutal a cargu de los Mossos d'Esquadra afalaos pol Conseller d'Interior Joan Saura col preste y permisu del rector Didac Ramirez y el Conseller d'Universitats Josep Huguet. Al nuestru paecer, que les fuercies de seguridá del Estáu entren nun recintu universitariu, ye'l reflexu de la cultura democrática probetaya d'aquellos que tan encargaos de xestionar esta “democracia” capitalista y burguesa, que nun tien problemes n'usar la violencia énte les protestes xustes y pacífiques de la ciudadanía. Esta represión englobase dientro de la política represiva que, tocántenes a esti tema, vien desendolcándose en Barcelona nos meses últimos col oxetivu d'estrapayar el movimientu anti-Bolonia. Toa una declaración de principios d'aquellos que, como Saura y Huguet, dícense d'izquierdes.
Ayeri quedó plasmao la seriedá cola que se toma l'Estáu español y, nesti casu, la Generalitat de Catalunya, el fechu de que les/os estudiantes de tol Estáu tomemos concencia y mos movilicemos contra unes reformes neolliberales que van imponemos ensin cuntar col nuestru preste, pese a ser nós les/os más interesaes/os.
Esta ye, nostante, la prueba de que tienenmos miéu. Tienen miéu a la organización del estudiantáu, que podamos parar l'EEES como yá algamó la mocedá en Grecia. Por eso pasen coses como les d'ayeri en Barcelona. Queremos dende Asturies facer un llamáu a toles/os estudiantes en movimientu contra Bolonia en tol Estáu a que sigan lluchando con más ganes que nunca; porque vista la represión, vese'l miéu d'aquellos que la desenrrollen. La victoria depende de lo que trabayemos, de que nun mos dexemos amedranar, y nun van ser quien pa con nós nin con toletes nin con armes. Nós, les/os estudiantes, tenemos la razón y vamos demostralo.
Queremos espresar la nuestra solidaridá coles/os firíes/os, deteníes/os y demás dañaes/os pola brutalidá policial en Barcelona, unvia-yos un saludu candial y manifesta-yos que la so llucha ye la nuestra llucha.
Desiximos, poro, la dimisión de los conseyeros Joan Saura y Josep Huguet, del director de los Mossos d'Esquadra Rafael Olmos y del rector Didac Ramirez, responsables de la represión descomanada contra estudiantes que nun faen otro que pidir diálogu, una enseñanza de calidá de sirva a los porgüeyos populares y non a los del capital y treslladar a la sociedá lo inxusto del Procesu de Bolonia. Al tiempu, desiximos la llibertá ensin cargos de toles/os deteníes/os, el cese de la represión policial y el refuerzu de la autonomía universitaria, que torga a la policía intervenir dientro de la Universidá.
Encamentamos tamién a los compañeros de partíu equí n'Asturies de Saura y al rector de la Universidá d'Uviéu Vicente Gotor a que se pronuncien polo socedío, y queremos entrugar a esti últimu y al delegáu del gobiernu n'Asturies, Antonio Trevín, si cuenten usar esta mesma política represiva si les coses se ponen fees equí. Aprovechamos tamién pa entrugar al señor rector si la presencia d'un miembru de la seguridá privada de la Universidá d’Uviéu na asamblea que celebramos ayeri pela mañana na Facultá d'Económiques va nesti mesmu sen.
Asamblea d'Estudiantes contra l'EEES d'Asturies
No hay comentarios:
Publicar un comentario